अशी ही दोन फुलांची कथा
एक शिवाच्या पदी शोभते । एक शवाच्या माथा ॥
इथला निर्माल्यही सुगंधी,तिथली माळही कुणी न हुंगी
इथे भक्तिचा वास फुलांना, तेथे नरकव्यथा ॥
जन्म जरी एकाच वेलीवर, भाग्यामध्ये महान अंतर
गूळखोबरे कुणा, कुणाला मिळे पिंड पालथा ॥
दोन फुलांचे एकच प्राक्तन, उच्च नीच हा भास पुरातन
एक शिळेला देव मानीते । एक पूजिते म्रॄता ॥
निर्माल्य कुणी मंदिरातला, अर्पियला गंगामाईला
जरा पलिकडे, स्मशानातला, पाचोळाही वाहत आला
फुलाफुलांची ओळख पटली । हसला जगन्नियता ॥
कवी - यशवंत देव
No comments:
Post a Comment