एकदा आहे तुला भेटायचे
खूप काही राहिले बोलायचे
दूर असताना मला छळतात हे
नाव भासांचे तुला सांगायचे
हे पहाटेच्या दवाला सांग तू
आज स्पर्शाने तुझ्या उमलायचे
बासरीचे सूर तू छेडू नको
थांबणे माझे पुन्हा लांबायचे
कोणती भाषा तुझ्या डोळ्यात ही
पाश शब्दांचे कसे उधळायचे
दोन घटकेचीच होती साथ ती
का मला आजन्म तू अठवायचे
दूर जाता आसवे डोळ्यात का
हे तुला नाही कधी समजायचे
आठवांच्या कोंडमाऱ्यातून या
श्वास घेणे हे मला विसरायचे
एकदा मी ही असे खेळेन रे
जीवना आहे तुला हरवायचे
वाट आहे पाहते कोणी तुझी
हे तुला मरणा कसे उमजायचे
बोलवाया एकदा येईल तो
सोडुनी हा खेळ मागे जायचे
कवी - विश्वास
No comments:
Post a Comment