सांगा कुणीतरी या आकाशखाजव्यांना-
"मातीच मोक्ष देई कंगाल नागव्यांना!"
आहे जरी उभा मी निष्पर्ण माळरानी
या स्वप्नपाखरांच्या रोखू कसा थव्यांना?
आली नव्या जगाची आली पहाट आली
आता उन्हात आणू पाळीव काजव्यांना!
येती जरी समोरी सारे नकोनकोसे
मीही नकोनकोसा झालो हव्याहव्यांना
साधाच मी भिकारी, माझी रितीच झोळी
गावात मान त्यांच्या श्रीमंत जोगव्यांना!
प्रत्येक आतड्याचा मी पीळ होत आहे
ते मात्र गाठ देती त्यांच्याच जानव्यांना!
गझलकार - सुरेश भट.
1 comment:
खूप छान कलेक्शन आहे अमित..कीप अप..
माझ्या ब्लॉग वर ही ये कधीतरी..
gnachiket.wordpress.com
Post a Comment