सूर्य केव्हाच अंधारला यार हो
या, नवा सूर्य आणू चला यार हो
हे नवे फक्त आले पहारेकरी
कैदखाना नवा कोठला यार हो
ते सुखासीन संताप गेले कुठे
हाय, जो तो मुका बैसला यार हो
चालण्याची नको एवढी कौतुके
थांबणेही अघोरी कला यार हो
जे न बोलायचे तेच मी बोलतो
मीच माणूस नाही भला यार हो
सोडली मी जरी स्वप्नभूमी तरी
जीवनाची टळेना बला यार हो
हासण्याची मिळाली अनुज्ञा कधी?
हुंदकाही नसे आपला यार हो
ओळखीचा निघे रोज मारेकरी
ओळखीचाच धोका मला यार हो
लोक रस्त्यावरी यावया लागले
दूर नाही अता फैसला यार हो
आज घालू नका हार माझ्या गळा
(मी कुणाचा गळा कापला यार हो)
गझलकार - सुरेश भट
No comments:
Post a Comment